Ban Ki-Moon amezungumza na wananchi wa Jamhuri ya Afrika ya kati kwa lugha ya Sango ya huko Jamhuri ya Afrika ya Kati, kupitia njia ya radio.
Baada ya salamu Bwana Ban ambaye ametuma ujumbe huo pia kwa lugha ya Kifaransa na kiingereza, amewahakikishia wananchi hao walio katika zahma ya mapigano ya kwamba hawako peke yao.
Aidha, Katibu Mkuu amesema yuko pamoja na wananchi hao na amewaahidi usaidizi wake wote kwa ajili ya amani na maridhiano, haki na uwajibikaji kwa wananchi wote wa Jamhuri ya Afrika ya Kati.
Ujumbe kamili wa Ban Ki-Moon:-
"Niko hapa kueleza mshikamano wangu na usaidizi kwa wananchi wa Jamhuri ya Afrika ya Kati. Hamko peke yenu! Mataifa mengi yanajitahidi kusaka amani!
Nimeomba jumuiya ya kimataifa kuchukua hatua zaidi! Askari na polisi wengi wanalinda raia, misaada zaidi kuokoa maisha. Nawasihi na ninyi, wananchi wa Jamhuri ya Afrika ya Kati na upinzani, acheni mauaji.
Acheni mauaji. Wekeni silaha zenu chini. Wale wanaofanya ghasia wanaigawa na kuiharibu nchi yenu pendwa. Waislamu na wakristu mmejenga nchi yenu kwa pamoja. Nafahamu mtafanya hivyo tena."
 |
| Ban Ki-Moon |